Taluq Torta Hun To Mukammal Torr Deta Hun

Taluq Torta Hun To Mukammal Torr Deta Hun
Jise Mein Chor Deta Hun Mukammal Chorr Deta Hun

Mohabbat Ho Keh Nafrat Ho, Bhara Rehta Hun Shiddat Se
Jidhar Se Aaye Ye Darya Udhar Hi Morr Deta Hun

Yaqeen Rakhta Nahi Hun Mein Kisi Kache Taluq Par
Jo Dhaga Tootne Wala Ho Us Ko Torr Deta Hun

Mere Dekhe Hue Sapne Kahin Lehrain Na Le Jayn
Ghronde Rait Ke Ta’meer Kar Ke Chorr Deta Hun

‘Adeem’ Ab Tak Wohi Bachpan Wohi Tehzeeb Kari Hai
Qafas Ko Torr Deta Hun, Parinde Chorr Deta Hun…

------------------------------------